محمد الدنقلي / شاعر اللهجة المحكية

أنست يللي من بعيد.. بين الحضور تشوفلي
وتهم بتسلم علي.. وجاحد انك ملهوفلي
يكفيك غير ورد الغلا.. في بسمتك..
حسيت بيه .. مقطوف لي ..
وملفوف لي .. ومحدوف لي ..
 آنست
***
آنست يللي .. ويللي.. ويللي …
كإنك تريد تقول….
وكيف اللي … وكيف اللي..؟
خطرها .. نبي نسأل .. لكن ما تجاوبني ..
لا بعدين.. لا توا ..
سؤالي ليك .. سكوتي خلى كل شي جوّا.
زعم مخدوش .. كيف حالي!
زعم مدهوش في دنيا السماحة ..وما خفا !
كيف ما جرالي..؟
زعم هللي علي بالك..
شبيه اللي علي بالي؟.
الوطن .. والناس .. والأوزون وغياب المطر….
والليل ..وليش يطول في بغداد ..
والمارينز.. والمسجات..
واللي صار في أيلول ..والقاعدة ..
وعجرم .. وشعبلّة ؟
يييه… !
خطرها ..أنا مالي …
الكل يقول : أنا مالي !!!
ما دامك جيت هاني جيت ..
تعال نسرق شوي فرحة ..
تعال احكي وتجلالي..
عيونك هي عيون الشعر ..
وأنا يا سمح . يا شفاف .. جنون الشعر بحلالي ..
تعال .. وهاك أشعاري .. موقّعها وكاتب تحتها :
اهداء مني ليك ..من غالي إلى غالي ..
وخليك ما تسلم علي.. واجحد انك ملهوف لي..
يكفيك غير ورد الغلا .. في بسمتك..
حسيت بيه : مقطوف لي ..
وملفوف لي .. ومحدوف لي.
آنست..